Yangi dizayn, hadya yaratish va boshqalar

Bu yangilanish Android uchun Telegram tarixidagi eng katta interfeys yangilanishi, ekskluziv yangi hadyalarni yaratish uchun hadya yaratish tizimi va boshqa koʻplab yangiliklarni oʻz ichiga oladi.

Katta dizayn oʻzgarishi

Telegramning Android uchun versiyasi ilova boʻylab harakatlanish va qidiruvni yanada tezroq hamda qulayroq qiladigan butunlay qayta ishlab chiqilgan interfeysga ega boʻldi. Yangi pastki panel chatlar, sozlamalar, profilingiz va boshqa ruknlar orasida shunchaki bitta bosish bilan oson oʻtish imkonini beradi.

Dizayn oʻzgarishlari bilan birga, Android dasturchilarimiz interfeys kodini toʻliq qayta yaratishdi — bu esa samaradorlikni oshirish va uni avvalgidan ham tezkorroq qilish imkonini berdi.

Siz interfeys effektlarini boshqarib, ishlash samaradorligini oshirishingiz va batareya quvvatini tejashingiz mumkin. Buning uchun Sozlamalar > Quvvatni tejash rejimi rukniga kiring.

iOS dasturchilarimiz ilovaga dizayni yangilangan media koʻrish vositasi, stiker va emoji paketlari uchun yangi razm solish panellari, shuningdek, foydalanuvchi profillarida va xabarlarni tanlashda yangilangan kontekst menyulari kabi yanada koʻproq Liquid Glass effektini qoʻshdi.

iPad uchun ilovada xabarlarni ⌘+Enter tezkor tugmasi bilan yuborish uchun yangi klaviatura sozlamasi ham mavjud.

Guruhlarni yangi adminga qoldirish

Agar guruh egasi chatni tark etsa, bir haftadan keyin guruh egaligi avtomatik tarzda adminlardan biriga oʻtkaziladi.

Yanada koʻproq nazorat uchun endi guruh egalariga guruhni tark etayotganda tasdiqlash oynasi koʻrsatiladi — bu yerda ular darhol yangi egani tanlashi mumkin.

Guruh va kanal egalari ham istalgan vaqtda chatni tark etmasdan egalikni boshqa aʼzoga oʻtkazishi mumkin.

Hayda yaratish

Kolleksiyalanadigan hadyalar ishga tushirilganidan buyon Telegram foydalanuvchilari 100 dan ortiq kolleksiyadan millionlab hadyalar yaratdi.

Bu yangilanishda mavjud kolleksiyalanadigan hadyalarni birlashtirib, Noodatiy, Kamyob, Epik yoki Afsonaviy turlarga aylantirish imkonini beruvchi hayratlanarli sanʼat asarlari va oʻziga xos effektlarga ega hadya yaratish tizimi taqdim etildi.

Hadya yaratish interfeysi sizga 4 tagacha hadya qoʻshish imkonini beradi, bunda har bir qoʻshimcha hadya muvaffaqiyat ehtimolini oshiradi. Bir xil atributlarga ega bir nechta hadyani ishlatish ham ushbu atributlarning yakuniy buyumda paydo boʻlish ehtimolini oshiradi.

Istalgan foydalanuvchi Telegramdagi Hadyalar marketpleysi orqali kolleksiyalanadigan hadyalarni xavfsiz sotib olishi va sotishi mumkin.

Botlar uchun rangli tugmalar

Bot dasturchilari endi interfeyslarni yanada qulayroq qilish yoki muayyan harakatlarni ajratib koʻrsatish uchun oʻz tugmalariga ranglar va emojilarni biriktirishi mumkin.

Botlardagi oxirgi yangilanishlar haqida toʻliq tafsilotlarni olish uchun maxsus oʻzgarishlar jurnali bilan tanishing.

Bu yangilanishda hammasi shular. Keyingi afsonaviy funksiyalar toʻplamini yaratishni tugatganimizdan keyin tez orada qaytamiz.

2026-yil 9-fevral
Telegram jamoasi